سندھ ہائی کورٹ نے اعظم سواتی کو مزید مقدمات میں گرفتار کرنے سے روک دیا

سندھ ہائی کورٹ نے سینیٹر اعظم سواتی کو مزید مقدمات میں گرفتار کرنے سے روک دیا۔ سندھ ہائیکورٹ میں تحریک انصاف کے سینیٹر اعظم سواتی کے خلاف سندھ میں درج مقدمات کے خلاف ان کے بیٹے عثمان سواتی کی درخواست پر سماعت ہوئی۔ عدالت نے آئی جی سندھ کو ہدایت کی کہ جہاں جہاں مقدمات درج ہوئے ہیں وہاں کے ایس ایس پیز کو بلوالیں، اگر تمام مقدمات کی وضاحت پیش نہیں کی گئی تو آپ کے خلاف کارروائی کی جائے گی۔ آئی جی سندھ غلام نبی نے عدالت سے مہلت مانگی، تاہم جسٹس کریم خان آغا نے آئی جی سندھ کی جانب سے مہلت مانگنے کی درخواست مسترد کردی، اور ریمارکس دیئے کہ کل تک تمام ایف آئی آرز لے کر آئیں۔ آئی جی سندھ نے عدالت کو جواب دیا کہ مجھ پر آپ کو بھروسہ نہیں تو میں کیا کہوں، عدالت کے ریمارکس سے مجھے تکلیف ہوئی ہے۔ جسٹس کے کے آغا نے آئی جی سندھ کو مخاطب کرتے ہوئے ریمارکس دیئے کہ آپ کو نوکری میں دلچسپی نہیں تو استعفیٰ دے دیں۔ عدالت کے ریمارکس پر بینچ اور آئی جی کے درمیان تلخ جملوں کا تبادلہ ہو گیا۔ آئی جی سندھ نے بینچ سے کہا کہ میں کیوں استعفیٰ دوں، میں آئی جی ہوں پورے صوبے کی پولیس کا سربراہ ہوں، ایس ایچ او نہیں، ہم عدالت کی عزت کرتے ہیں عدالت سے بھی احترام کی توقع رکھتے ہیں، آپ کو بھی ہماری عزت کرنی چاہئے۔ اس موقع پر پراسیکیوٹر جنرل نے مداخلت کرتے ہوئے عدالت سے کہا کہ وہ آئی جی کی طرف سے معافی مانگتے ہیں۔ جس پر عدالت نے پراسیکیوٹر جنرل سے سوال کیا کہ آپ بتائیں ایک ہی واقعہ کی اتنی ایف آرز کیسے کٹ گئیں۔ عدالت نے اعظم سواتی کو مزید مقدمات میں گرفتار کرنے سے روک دیا اور درج کئے گئے مقدمات کی تفصیلات بھی پیش کرنے کا حکم دے دیا۔
https://www.samaa.tv/news/40012276/